Фудбалската федерација на Македонија ќе добие нови вонредни средства од УЕФА во висина од еден милион евра за подобрување на фудбалската инфраструктура во Македонија, изјави на денешната прес – конференција генералниот секретар на ФФМ, Филип Поповски.
„Денеска официјално можеме да потврдиме дека ФФМ со помош на УЕФА е способна институција да ги поддржи идните проекти во нашиот фудбал, од изградбата на инфраструктура до работа со млади категории, кои се во нашиот фокус и согласно стратешкиот план на федерацијата. Со гордост можам да најавам е дека благодарение на реализираните проекти, УЕФА ни доделува нови, вонредни средства од „Хет Трик“ програмата во висина од еден милион евра“ – изјави Филип Поповски, генерален секретар на ФФМ.
„Овие средства од минатите „Хет-трик“ програми на УЕФА ќе ги насочиме кон подобрување на фудбалската инфраструктура а со новиот „Хет-Трик 5“ една од можностите е комплетна доградба на главниот стадион во комплексот – „Петар Милошевски“ и можноста да создадеме услови и нашата А репрезентација да игра дел од натпреварите на стадион во нашиот комлекс. Убеден сум дека повторно ќе ја оправдаме довербата која е многу значајна не само за ФФМ, туку и за националните селекции, клубовите во Македонија, Академијата и тренерската струка, изјави Поповски, најавувајќи нов проект за едукација на нашите тренери од програмата Еразмус +, во која ќе бидат вклучени 20 наши тренери со обуки во ПАОК, Матерзбург и Пескара.