Аргентинската фудбалска ѕвезда Лионел Меси синоќа во Париз е прогласен за најдобар играч во 2022 година во изборот на Меѓународната фудбалска федерација (ФИФА).
Меси оваа награда ја заслужи освојувајќи ја титулата на неодамнешното Светско првенство во Катар. Напаѓачот на ПСЖ беше најдобар играч и во 2019 година, а последните двапати најдобар играч беше прогласуван Полјакот Роберт Левандовски.
За најдобра фудбалерка е прогласена Алексија Путелас, која со Барселона играше во финалето на Лигата на шампионите. Најдобар тренер во машкиот фудбал е селекторот на Аргентина, Лионел Скалони, кој ја предводеше јужноамериканската репрезентација до третата светска шампионска титула.
Во женска конкуренција наградата ја освои Холанѓанката Сарина Вигман која со англиската селекција стана шампион на Европа.
За најдобар голман е прогласен аргентинскиот чувар на мрежата и член на Астон Вила, Емилијано Мартинез, додека во женска конкуренција наградата ја освои голманката на Англија Мери Ерпс. Наградата за најдобар гол му припадна на Полјакот Марчин Олекси, кој постигна гол „ножички“ на патерици.
Наградата за фер-плеј му припадна на Грузиецот и член на Кремонезе Лука Лочошвили, додека за најдобри навивачи беа прогласени поддржувачите на репрезентацијата на Аргентина.