Почнувајќи од средата, 19 јануари, започна продажбата на билети за Светското првенство во фудбал во 2022 година во Катар, а според информциите кои ги објави ФИФА, огромна е побарувачка низ целиот свет за влезници.
Во првите 24 часа од почетниот продажен период, фановите ширум светот побараа над 1,2 милиони билети.
Најголема побарувачка имаа навивачите од Катар, а потоа следат фудбалските навивачи од Аргентина, Мексико, САД, Обединетите Арапски Емирати, Англија, Индија, Саудиска Арабија, Бразил и Франција, се наведува на официјалната веб-страница на ФИФА.
За финалниот натпревар биле побарани повеќе од 140.000 билети, а за воведниот натпревар повеќе од 80.000 билети.
Првата фаза од продажбата на билетите ќе трае до 8 февруари.
Претходно беше објавено дека за странските навивачи минималната цена на билетот ќе биде 69 долари, што е за една третина поевтино отколку на Светското првенство во Русија 2018 година (105 долари). Станува збор за билети од трета категорија.
Најевтините билети од четвртата категорија, кои можат да ги купат само жителите на Катар, ќе чинат 11 долари – два пати поевтино отколку што беше за Русите на Светското првенство во 2018 година.