ФИФА побара од мексиканските фудбалски власти најостри казни за предизвикувачите на големите нереди на мечот од 9. коло на мексиканското првенство меѓу Керетаро и Атлас.
Средбата беше прекината во 62. минута поради масовен судир на навивачите. Државната полиција од Керетаро извести за 22 повредени и двајца хоспитализирани во критична состојба. Подоцна во медиумите се појавија информации за 17 загинати.
„ФИФА е шокирана од трагичниот инцидент што се случи на стадионот Корегидора во Керетаро за време на натпреварот од првенството на Мексико. Насилството е неприфатливо и неподносливо. ФИФА и се придружува на Мексиканската фудбалска асоцијација и на КОНКАКАФ во осудата на овој варварски инцидент. Ги повикуваме локалните власти што поскоро да ги изведат одговорните пред лицето на правдата. Нашите мисли се со сите погодени од немирите. ФИФА уште еднаш сака да нагласи дека никако не треба да има место за насилство во фудбалот и ќе продолжи да работи со сите засегнати страни за да го искорениме“, се вели во соопштението на ФИФА.