Еден месец по незаборавното финале на Светското првенство во Катар меѓу Аргентина и Франција, ФИФА ги објави бројките поврзани со ова натпреварување.
Финалето, кое Аргентина го доби на пенали, го следеа 88.966 гледачи на стадионот Лусаил во Катар, а покрај нив и уште 1,5 милијарди луѓе ширум светот. Според американска компанија за информации, податоци и мерење пазарот „Нилсен“, Светското првенство го следеле пет милијарди луѓе на различни платформи.
Натпреварите на стадионите во Катар ги следеа 3,4 милиони луѓе, повеќе отколку првенството во Русија во 2018 година кое го следеа три милиони гледачи. Во Катар беа постигнати рекордни 172 гола, додека на првенствата 1998 и 2014 година беа постигнати 171 гол.
Кристијано Роналдо стана првиот играч кој постигнал гол на пет Светски првенства (2006, 2010, 2014, 2018 и 2022 година), а Лионел Меси стана првиот играч кој постигнал гол во нокаут фазата на четири последователни првенства откако ФИФА го воведе осминафиналето во 1986 година. Со 26 одиграни натпревари на Светското првенство, Меси го надмина и досегашниот рекордер Лотар Матеус.
Стефани Фрапарт стана прва судијка на Светското првенство, а за првпат во историјата, три африкански селекции влегоа во топ 16. Мароко стана првата африканска земја што се пласираше во полуфиналето.