Македонскиот таеквондист Дејан Георгиевски беше на чекор до уште еден огромен успех и златен медал, но поради повреда го откажа својот настап во финалето на Г1 турнирот во теквандо во Букурешт, Романија, и така се враќа со сребрен медал.
Нашиот најдобар таеквондист забележа три чисти победи од по 2:0 против Мануел Полет од Белгија, Андриј Харбар од Украина и Емре Кталмиш од Турција. Но, поради повреда на раката не можеше да настапи во борбата за златен медал.
„Овој спортски или олимписки подвиг кој го покажува Дејан Георгиевски ни одблиску не е забележан откако Македонија е самостојна држава. За само два месеци тој настапи на четири официјални олимписки турнири Г1, освои четири медали, и тоа две златни и две сребрени“, соопшти Македонската таеквондо федерација.
Исто така треба да се напомене дека Георгиевски речиси две рунди се бореше со повредена рака против Кталмиш, кој се смета за еден од најдобрите светски таеквондисти во овој момент.