Скандал избувна во холандскиот фудбал откако се дозна дека резултатите од 133 натпревари во највисоката лига Ередивизие би можеле да бидат прогласени за неважечки, објави „The Athletic“.
Истрагата откри дека на голем број фудбалери кои сакале да го променат своето спортско државјанство и да играат за репрезентациите на земји како Индонезија и Суринам им е доделено соодветното државјанство. Сепак, со овој потег, тие автоматски го изгубиле своето холандско државјанство, бидејќи двојното државјанство е забрането со закон.
Ова значи дека играчите за кои станува збор повеќе не се државјани на Европската Унија и морале да добијат посебни дозволи за работа во Холандија, како и да бидат регистрирани по соодветен редослед кај фудбалските клубови и федерацијата.
Подоцна се дозна дека фудбалерите без потребната документација учествувале во десетици натпревари. Резултатите од околу 133 натпревари, во кои повеќе од 25 играчи биле користени со нерегуларен статус, се под знак прашалник.
Првиот официјален протест веќе е поднесен. НАЦ Бреда бара повторување на нивниот натпревар и пораз од 6:0 од Го Ахед Иглс. На натпреварот настапи дефанзивецот Дин Џејмс, кој неодамна стана индонезиски државјанин, што значи дека автоматски го изгуби холандското државјанство и му беше потребна работна дозвола за да игра.
Според „Атлетик“, се очекува судот во Утрехт да донесе одлука за случајот во понеделник и тоа би можело да биде пресвртница. Доколку НАЦ Бреда го добие случајот, се очекува наплив на жалби од други клубови, што потенцијално ќе доведе до хаос во лигата.

