Синоќа беа најавени големи промени во ФК Вардар и денес сето тоа беше потврдено од страна на клубот. Самиот клуб јавно се огласи и им се заблагодари на Грнчаров и Бајевски кои заминуваат, па обелодени кои се нивните привремени замени.
Ѓоко Хаџиевски ќе ја води екипата против Воска Спорт в недела, со помош на координаторот на школата Бобан Бабунски. Потоа клубот ќе назначи перманентни решенија на испразнетите позиции.
„Ја известуваме целокупната јавност дека тренерот на екипата Бобан Грнчаров, спортскиот директор Александар Бајевски, заедно со членовите на стручниот штаб Орхан Абди, Игор Тасевски и Стево Митревски поднесоа оставки на функциите и повеќе не се дел од ФК Вардар.
Би сакале во името на клубот, да се заблагодариме за професионализмот, енергијата и трудот кои во текот на двете години ги вложивте во клубот и затоа што покажавте колку е важно да се биде онаму каде што се брани „црвено-црното.”
Екипата денес, по планот заминува во карантин, каде што под водство на вардаровата легенда Ѓоко Хаџиевски и координаторот на младинската школа Бобан Бабунски, ќе ги одработи последните подготовки пред натпреварот против Воска. Во името на клубот им се заблагодаруваме поради тоа што веднаш ја прифатија понудата и се ангажираа да го водат клубот на овој важен натпревар.
Јасно напоменуваме дека ова е само преодно решение. Клубот уште вчера започна преговори со потенцијалната замена на позицијата тренер и засега можеме да кажеме дека истите течат добро. Во најбрз можен временски рок, официјално ќе го соопштиме името на новиот тренер за кој сметаме дека достојно и чесно ќе ја води екипата во понатамошниот период“, се вели во соопштението на нашиот најтрофеен клуб.
Вардар во првите две кола загуби од АП Брера и Шкупи и не постигна гол. Дуелот против Воска Спорт се игра в недела од 17:00 часот во Охрид.