Напаѓачот на Манчестер Сити, Ерлинг Халанд, синоќа имаше свое шоу на мечот со Лајпциг постигнувајќи пет гола и уривајќи неколку рекорди во ЛШ. По мечот тој изјави дека ова е една неверојатна вечер за него.
„Одлична вечер. Прво, горд сум што играм на овој турнир, ми се допаѓа. Пет гола! Да се победи со 7-0 е неверојатно. Сè ми е во магла. Се сеќавам како погодував, но не се сеќавам на што мислев во мометот. Многу сум уморен од славење голови. Мојата моќ е да постигнувам голови. Дали треба да бидам искрен? Толку многу голови денес. Не размислував многу – само се обидов да ја испратам топката во мрежата. Се работи за брзо размислување и обид да се испрати топката таму каде што нема голман. Му кажав на Гвардиола по замената дека ако ме оставеше во игра би можел да постигнам и двоен хет-трик, но што да правам?“, низ насмевка прокоментира Норвежанецот.
Ѕвездата на Манчестер Сити со пента-трикот успеа да дојде до 33 постигнати гола во Лигата на шампионите, со што стана фудбалерот кој најбрзо успеал да дојде до бројката од 30 постигнати гола во најсилното европско клупско натпреварување во историјата. На Халанд му беа потребни само 25 натпревари за да постигне ваков резултат. Претходно рекордот го држеше Руд ван Нистелрој, кој на 34 натпревари постигна 30 гола. Халанд стана и најмладиот играч во историјата со 30 гола во Лигата на шампионите бидејќи вчера имаше точно 22 години и 236 дена. Поранешниот рекордер Килијан Мбапе го постигна својот 30-ти гол кога имаше 22 години и 352 дена.