Денеска во Скопје на 54-годишна возраст ненадејно почина новинарот на порталот Спортманија, Зоран Поповски.
Македонското спортско новинарство денес загуби колега кој во изминативе години беше дел од повеќе спортски редакции, колега кој несебично знаеше да помогне со своето познавање на спортот. Зоран Поповски имаше повеќе од дводецениско новинарско искуство, работејќи за повеќе медиуми како А1, „Дневник“, „Македонски спорт“, „Спортмедиа“, „Република“, а од летото 2018 година беше во Спортманија каде работеше до денес.
Како новинар вљубеник во фудбалот, тој известуваше најмногу од фудбалски настани, а меѓу долгата листа настани од кои известуваше се и историското за нас Европско првенство во 2021 на кое за првпат играше Македонија, како и ЕП за младинци во Полска во 2017 година. Во текот на изминатите години беше неколку пати дел од нашата програма како наш гостин со кого ги следевме најголемите фудбалски настани (ЕП и СП) со кого имавме одлична соработка.
Погребот ќе биде извршен утре на градските гробишта Бутел, во 13 часот, а телото ќе биде изложено во капелата од 12 часот.
Почивај во мир Зоки!