Тензии по завршувањето на натпреварот меѓу Рома и Аталанта, кој синоќа заврши со победа на домаќините од 2:1.
Според повеќе италијански медиуми, извршниот директор на Аталанта, Лука Перкаси, по последниот судиски свиреж влегол во вербален конфликт со спортскиот директор на Рома, Тони Д’Амико. Наводно, Перкаси му упатил навреди, но Д’Амико не одговорил на провокациите.
Ситуацијата, сепак, не завршила тука. Според информациите на „Кориере дело Спорт“, Перкаси го следел Д’Амико до паркингот на „Олимпико“, по што морало да интервенира обезбедувањето за да се спречи понатамошна ескалација.
Причината за тензијата, според италијанските извори, се несогласувањата меѓу двајцата кои траат подолго време. Д’Амико до ова лето беше спортски директор на Аталанта, но потоа замина во Рома, каде што повторно се сретна со Џан Пјеро Гасперини, кој претходно го напушти клубот од Бергамо и седна на клупата на „волчицата“.
Од Рома, наводно, однесувањето на Перкаси го сметаат за неприфатливо и клубот е подготвен да преземе мерки за да го заштити својот спортски директор. Од Аталанта засега нема официјална реакција.

