Директорите на Интер се сретнаа со претставници на напаѓачот на Ајакс, Себастијан Алер, пишува „Газета дело спорт“.
Сепак, преставниците на Интер биле информирани дека холандскиот гигант бара 35 милиони евра за 27-годишниот играч од Брегот на Слоновата Коска, кој има одлична сезона во дресот на клубот од Амстердам и е еден од најпродуктивните напаѓачи во Европа. Досега оваа сезона Алер има постигнато 32 гола на 34 натпревари во сите натпреварувања. Има 19 гола во шампионатот на Холандија и 11 во Лигата на шампионите.
Интер во моментов не сака да плати толкава сума за играчот, но самиот играч е отворен за трансфер во Серија А и двете страни ќе останат во контакт.
Алер не е единствениот напаѓач кој е на радарот на италијанскиот шампион. Интер веќе започна преговори со Сасуоло за Џанлука Скамака. Потенцијална опција за миланскиот гигант е и Ромелу Лукаку, бидејќи во моментов се чини дека Белгиецот не се чувствува среќен во Челзи и е отворен за враќање на „Џузепе Меаца“. Сепак, финансиската состојба на Интер во моментов најверојатно нема да му дозволи на клубот повторно да потпише со Белгиецот.
Алер го носи дресот на Ајакс од јануари 2021 година, а во кариерата претходно има настапувано за Оксер, Утрехт, Ајнтрахт (Франкфурт) и Вест Хем.