Она што во текот на вчерашниот ден го најави Горан Пандев во своето интервју денес полека добива потврда. Македонскиот фудбал се наоѓа пред историски момент затоа што за првпат на клупата на наш прволигаш ќе седне тренер кој доаѓа од Италија, а со него во стручниот штаб исто така ќе работат негови сонародници.
Струмичкиот прволигаш, кој во новата сезона ќе го носи името Академија Пандев Брера Струмица, се договори со Џовани Валенти и нему ќе му ја довери клупата во наредниот период. Станува збор за 47-годишниот Италијанец кој во периодот кој следи ќе биде официјално преставен како нов тренер на оваа екипа. Валенти доаѓа во Струмица од младинскиот погон на Парма, каде ја водеше екипата до 18 години. Во 2019 и 2020 година беше асистент во репрезентацијата до 19 и 20 години, а претходно работеше во младинските категории на Јувентус, Бреша и Милан.
На Валенти ќе му помага 56-годишниот Микеле Кавали, кој во својата кариера работеше во Шахтјор, Сасуоло и Јувентус. Тренер на голмани ќе биде Алесандро Пегорари, кој исто како и во Валенти, до минатата сезона работеше во Парма. Единствено кондициониот тренер на екипата Дарко Коцев останува од претходниот стручен штаб.
Со оваа структура Брера ќе го означи новиот почеток, во кој наскоро ќе промовира и засилувања за сезоната 2023/24. Горан Пандев останува претседател на клубот и целосно ќе биде вклучен во случувањата на клубот, а тука ќе биде и Аце Стојков кој ќе биде дел од првата екипа. Пандев најави дека акцент ќе биде ставен на млади фудбалери и нивниот развој.