Јувентус планира да ги прекине преговорите за нов договор со напаѓачот Пауло Дибала. Актуелниот договор на Аргентинецот истекува во 2022 година и се очекуваше тој повторно да потпише.
Неговиот агент дури пристигна во Торино пред еден месец, но никогаш не беше во можност да се сретне со директорот Фабио Паратичи, бидејќи тој беше во изолација поради случаи на инфицирани со КОВИД-19 играчи во тимот. Сега агентот планира да замине за својата татковина, а преговори евентуално ќе бидат одложени во подоцнежна фаза.
Раководството на Јуве почна сериозно да се двоуми дали да му понудат нов договор на Дибала. Напаѓачот сака двојно повеќе пари отколку што моментално добива, надевајќи се дека неговата плата ќе биде 7 милиони евра годишно. Во исто време, неговата форма повторно падна и тој дури седна на клупата на неколку натпревари од почетокот на сезоната.
Друг проблем со евентуалното повторно потпишување е што Јувентус не може да си дозволи да ги исполни финансиските барања на Дибала, бидејќи клубот поминува низ финансиски потешкотии поради намалените приходи заради пандемијата со коронавирусот.

