Легендата на Манчестер Јунајтед, Ерик Кантона, го изрази својот целосен бес поради одлуката на клубот да го раскине договорот со Сер Алекс Фергусон како почесен амбасадор на „црвените ѓаволи“ на крајот од сезоната.
Најголемиот менаџер во историјата на Јунајтед беше отпуштен поради намалувањето на буџетот од страна на новите сопственици на клубот, а извештаите на Островот велат дека Сер Алекс повеќе нема да има пристап до соблекувалната на првиот тим, иако тој продолжува да има резервирано место во ложата на Олд Трафорд.
„Сер Алекс треба да може да прави што сака во клубот до денот кога ќе умре. Каков недостаток на почит. Ова е голема срамота. Сер Алекс Фергусон ќе биде мојот менаџер засекогаш! Сите ги фрлам во голема вреќа на сра…е!“, напиша Кантона кој е познат дека нема влакно на јазик.
Токму брилијантниот Французин е еден од најважните играчи во ерата на Сер Алекс во Манчестер Јунајтед. По потпишувањето на Кантона, клубот ја освои својата прва лига титула по 27 години и прва од 13-те под водство на Фергусон.

