Македонската фудбалска репрезентација до 21 година денес ќе го одигра својот трет натпревар од квалификациите за ЕП 2021 година.
Противник на нашите млади фудбалери е селекцијата на Казахстан, репрезентација која досега има одиграно 4 натпревари и остварено 2 победи и 2 порази, но интересно е тоа што и двете победи ги реализираше на гостински терен. Токму ова треба да биде предупредување за нашите фудбалери кои за противник денес имаат селекција која игра добро на гостувањата. Македонија на стартот на овие квалификации оствари две победи, против Фарски Острови (7:1) на домашен терен и Црна Гора (2:1) во Подгорица.
Сепак за да се продолжи серијата на победи потребно е и денес избраниците на селекторот Благоја Милевски да одиграат квалитетно, борбено и да слават на средбата со Казахстан. Во нашата репрезентација се свесни дека ова нема да биде лесен натпревар затоа шро казахстан располага со доста квалитетни, силни и технички добро подготвени играчи, а за да се дојде до победа ќе треба да се исполнат сите задачи од селекторот Милевски.
Натпреварот Македонија – Казахстан се игра денес од 14.30 часот на теренот на ФФМ (Тренинг центар „Петар Милошевски“), а ќе можете да го следите и низ нашата програма. Во нашата група пподоцна ќе играат уште Израел – Фарски Острови и Црна Гора – Шпанија.