Менаџерот на Ливерпул, Јирген Клоп не штедеше суперлативи за неговиот колега од Манчестер Сити, Пеп Гвардиола, пред долго очекуваниот судир меѓу двата тима. Двајцата специјалисти имаа многу битки за паметење во изминатата деценија, прво во Бундеслигата, а потоа и во Премиер лигата, а во недела се соочуваат за последен пат во англискиот шампионат пред Клоп да си замине од Ливерпул на крајот од сезоната.
Ливерпул има мала предност од еден бод на табелата пред неделниот натпревар на „Енфилд“, а Клоп може да се пофали со мала предност во 29-те натпревари меѓу нив, со 12 победи наспроти 11-те на Гвардиола. „Пеп е најдобриот менаџер на светот. Имав навистина добра кариера, но не сум ни блиску до неговите успеси“, изјави Клоп.
„Не знам како би можел да ги оценувам тренерите од минатото, но во мојот живот тој е најдобар. Гледам совршенство кога стојам пред него и Пеп е дефинитивно тоа. Никогаш не се откажав иако имаше околу 3000 фудбалери кои беа подобри од мене и јас сепак ја сакав играта. Само што ми кажаа дека имам позитивен биланс против Пеп… Да бидам искрен, немам поим како се случи тоа. Но, вие ме прашувате за најдоброто: тој е најдобар“, изјави Клоп.
Клоп потенцираше дека неделниот натпревар не мора да биде решавачки во битката за титулата затоа што остануваат уште многу натпревраи до крајот на сезоната, а разликата на табелата е многу мала.

