Вечерва во 21 часот ќе се одиграат првите два меча од четвртфиналната серија во најсилното европско клупско натпреварување, Лигата на шампионите.
Старите познаници Реал Мадрид и Манчестер Сити се среќаваат на „Сантијаго Бернабеу“ во најатрактивниот дуел од четвртфиналето. Двата тима трета сезона по ред се среќаваат во нокаут-фазата на турнирот. Минатата сезона „граѓаните“ ги победија Шпанците со вкупен резултат 5-1 во полуфиналето, а година пред тоа се сретнаа во истата фаза, но, тогаш Реал беше победник.
Во вториот меч, Арсенал го пречекува Баерн (Минхен) на „Емирати“. Двата тима во овој дуел влегуваат од сосема различни позиции според формата. Лондончани се во жестока битка со Ливерпул и Манчестер Сити за титулата во Англија, а веќе се на врвот, додека Баварците викендов забележаа нов пораз и речиси сигурно ги минуваат последните денови како германски шампиони.
Историски Баерн Минхен има шест европски титули, додека Арсенал нема ниту една.

