Фудбалската репрезентација на Македонија денес гостува кај Грузија во клучниот натпревар за исходот на врвот во групата 4 од Лигата на нации Ц конкуренцијата. Македонија е во лоша положба , пред се поради високиот пораз кој го доживеавме во Скопје од 0:3, па сега доколку сакаат да го нападнат првото место на Грузија, нашите фудбалери треба да победат со поголема разлика.
Тбилиси е местото каде се игра оваа средба, тоа е градот кој ќе остане забележан во историјата на мак-фудбалот, бидејќи токму таму нашата најдобра селекција обезбеди пласман на историското Европско првенство, сега сепак ситуацијата е различна. Само победа со три или повеќе разлика ја остава Македонија во игра за првото место, а сите останати исходи ќе значат опстанок во Лигата Ц и за следното издание. Сепак, со тоа важно е дека се губи шанса преку ова натпреварување да се игра нов бараж за пласман на Европското првенство. Од националниот тим отсуствата се навистина бројни, но и важни. Пред сè, можеби најмногу ќе недостига капитенот Стефан Ристовски, тука е и името на неговиот соиграч од Динамо Загреб, Аријан Адеми, а со сигурност нема да играат Дарко Чурлинов, Тихомир Костадинов и Ваљон Етеми. Милевски реагираше во одбраната па го повика Егзон Бејтулаи, додека средината и нападот останаа со веќе повиканите играчи.
Досега Македонија и Грузија имаат четири меѓусебни пресметки, со идентичен скор од по една победа и две нерешени средби со по 1:1. На клупата на Грузија е француската легенда Вили Сањол, додека Квича Квараташкелија игра во неверојатна форма во Серија А, а останатите одлично го надополнуваат. Во нашата репрезентација ги имаме Елиф Елмас, Енис Барди, Александар Трајковски, Столе Димитриевски кој треба да им дадат импулс на помладите.
Натпреварот во Тбилиси започнува во 18 часот. По натпреварот со Грузија Тбилиси, нема време за одмор, бидејќи веќе в понеделник од 20:45 часот на арената „Тодор Проески“ ја пречекуваме Бугарија. Значењето на овој натпревар ќе зависи во огромна мера од денешната пресметка со Грузија. Доколку Македонија ја исполни целта и успее да победи убедливо, тогаш против Бугарија ќе треба да се потврди првото место. Сепак, доколку тоа не е случај тогаш ќе се игра натпревар за престиж. Без оглед на исходот во Грузија, за натпреварот в понеделник против Бугарите, се очекува победа на Македонија за достојно завршување на третото издание на Лигата на нациите.