Вечерва РБ Лајпциг го пречекува Манчестер Сити во првиот осминафинален натпревар од Лигата на шампионите. Денешниот натпревар кој започнува во 21 часот се игра во Лајпциг, а реваншот е на 14 март во Англија.
Манчестер Сити започна уште една сезона во нокаут фазата од Лигата на шампионите со надеж дека конечно ќе стигне до трофејот. „Граѓаните“ во последните години секојпат беа меѓу фаворитите, но триумфот на овој турнир остана неостварлив. Тие беа најблиску до освојување пред две години, но загубија од Челзи во финалето.
РБ Лајпциг не изгледа како тим што може да го запре тимот на Гвардиола и покрај одличната форма од октомври. Во септември, клубот го назначи Марко Розе, а тој успеа да ја сврте сезона во позитивна насока. Тимот беше во серија од 18 натпревари без пораз во сите натпреварувања пред да загуби кај Унион Берлин пред 10 дена. Розе, кој е роден во Лајпциг, го трансформираше тимот и му даде нова самодоверба.
Добра вест за Германците е враќањето на Кристофер Нкунку. Тој непосредно пред Светското првенство во Катар се здоби со повреда на коленото и го пропушти Мундијалот. Пред неколку дена се врати на теренот и забележа асистенција во победата над Волфсбург. Сепак, Дани Олмо го пропушта натпреварот поради повреда.
Минатата сезона двата тима беа во иста група во Лигата на шампионите. „Граѓаните“ победија со 6:3 во Манчестер, а Нкунку постигна хет трик.
РБ Лајпциг победи во Германија со 2:1, но натпреварот не беше важен за конечниот пласман. Тоа е единствениот пораз на Манчестер Сити од германски тим во Лигата на шампионите во 17 натпревари.
Тимот на Гвардиола ќе треба брзо да го заборави разочарувањето од последното коло во Премиер лигата кога испушти победа на гостувањето кај Нотингем Форест. По многубројните пропуштени шанси на „граѓаните“, средбата заврши 1:1 и беше чекор назад во битката за титулата само неколку дена откако го добија мечот против лидерот Арсенал.
Кевин Де Бруин и Емерик Лапорт не се најдоа во составот за натпреварот, како и Џон Стоунс кој продолжува со опоравувањето од повредата. Во отсуство на Де Бруин, Гвардиола мора да одлучи дали ќе продолжи да се потпира на Бернардо Силва или ќе го ослободи Нејтан Аке на таа позиција и ќе го пресели Португалецот во центарот на теренот. Во неколку наврати, кога Де Бруин не играше, менаџерот го внесуваше Јулијан Алварез и ја менуваше шемата.
Можни состави:
РБ Лајпциг: Бласвич, Симакан, Орбан, Гвардиол, Халстенберг, Лаимер, Шлагер, Чобочлаи, Форсберг, Андре Силва и Вернер.
Манчестер Сити: Едерсон, Волкер, Рубен Диас, Аканжи, Аке, Бернардо Силва, Родри, Гундоган, Марез, Халанд и Грилиш.
Судија: Сердар Гозубујук (Холандија)