Манчестер Сити е домаќин на РБ Лајпциг на стадионот „Етихад“ во реванш натпреварот од осминафиналето на Лигата на шампионите. РБ Лајпциг го издржа притисокот од Манчестер Сити пред три недели и двата тима одиграа нерешени 1:1 на Ред Бул Арената, оставајќи неизвесност за реваншот.
Риад Марез погоди за Манчестер Сити (27 минута), а Јошко Гвардиол го израмни резултатот (70 минута). „Граѓаните“ целосно доминираа во првото полувреме и на пауза заминаа со близу 75% посед на топка и седум удари кон противничкиот гол, а потоа домашните излегоа целосно мотивирани и може само да жалат што не постигнаа целосен пресврт.
Изминатиот викенд, тимот на Пеп Гвардиола ја забележа четвртата последователна победа во сите натпреварувања, откако го совлада Кристал Палас со 1:0 благодарение на голот од пенал на Ерлинг Халанд.
Последен пат „Граѓаните“ беа елиминирани во оваа фаза од Лигата на шампионите во сезоната 2016/17, кога беа исфрлени од Монако. Сити може да го израмни рекордот на Арсенал стар 14 години за најмногу натпревари без пораз на домашен терен во Лигата на шампионите од англиските тимови. Серијата без пораз на „Граѓаните“ на стадионот „Етихад“ во ова натпреварување сега изнесува 23 натпревари, а Сити победи на 21 од нив.
Интересен е податокот дека Пеп Гвардиола е последниот тренер кој предводел германски тим до победа на „Етихад“. Ова се случи во сезоната 2013/14, кога Шпанецот беше на чело на Баерн (Минхен). Оттогаш, германските тимови имаа девет неуспешни обиди за да победат во Манчестер. Сепак, РБ Лајпциг е без пораз во пет последователни натпревари во Лигата на шампионите.
Викендов РБ Лајпциг ја победија Борусија (Менхенгладбах) со 3:0. Пред тоа, сепак, РБ Лајпциг загуби од Борусија (Дортмунд) на „Сигнал Идуна Парк“ во Бундеслигата, со што стави крај на нивната импресивна серија од девет натпревари без пораз во сите натпреварувања.
Пеп Гвардиола нема никакви проблеми со повредени играчи, па може да се потпре на најдоброто што му стои на располагање. Најнепријатно за Марко Розе е отсуството на Кристофер Нкунку, кој пред две години постигна хет-трик на стадионот „Етихад“. Надвор од комбинација поради повреди се и Гулачи, Диало и Шлагер.
Можни состави:
Манчестер Сити: Едерсон, Волкер, Аканжи, Рубен Диаз, Марез, Б.Силва, Родри, Грилиш, Гиндоган, Де Бруин и Халанд
РБ Лајпциг: Бласвич, Хенрих, Орбан, Гвардиол, Раум, Лајмер, Кампл, Чобочлаи, Форсбер, Вернер и Андре Силва
Судија: Винчиќ (Словенија)