Марио Балотели ќе биде повикан во репрезентацијата на Италија тогаш кога ќе биде во добра форма, за да биде корисен на тимот, изјави селекторот на „азурите” Роберто Манчини на прашањето зошто напаѓачот е надвор од тимот за двата натпревари кои се играат овој месец.
Тренерот рече дека истото важи и за напаѓачот на Торино, Андреа Белоти, а причините за неговото не повикување се чисто спортско-технички.
Балотели беше повикан за првиот натпревар на Манчини на чело на тимот во мај, но од почетокот на оваа сезона има одиграно само три средби за својот клуб Ница и сеуште нема постигнато гол. А за натпреварот против Тулуз изминатиот викенд дури и не беше во составот.
Белоти од Торино има осум натпревари во Серија А оваа сезона со постигнување на два погодока, а тоа е недоволно за да го импресионира селекторот Манчини.
„И двајцата не се во најдобра форма во моментов, но се дел од проширениот состав и вратите и за нив, како и за секој квалитетен фудбалер, се отворени постојано. Кога че бидат подготвени 100 %, ќе бидат повикани“, изјави Манчини.
Италија ја пречекува Украина во петок во Џенова, а во среда ќе гостува кај Полска во рамките на Лигата на нации.
За овие два натпревари селекторот најави состав, полн со млади играчи и дебитанти, велејќи дека сака да види уште играчи пред стартот на квалификациите за Евро 2020 во март. Ова исто така се случи во натпреварот против Португалија, загубија со 0:1 во септември, а Манчини го постави својот тим како тим до 23 години.