Марко Верати би можел да го напушти Пари Сен Жермен. Италијанскиот интернационалец веќе е во својата 11-та година како игра за клубот, но оваа сезона не се претстави на вообичаеното високо ниво.
Според „Л‘Екип“, Верати размислува да го напушти ПСЖ, иако неодамна потпиша нов договор и е врзан со парижаните до 2026 година. 30-годишниот играч не е задоволен од развојот на тимот и атмосферата во соблекувалната. Според него, критиките на навивачите и протестите кон играчите не се заслужени. Неговото мислење е дека казната која клубот му ја изрече на Лионел Меси била преголема. Помеѓу сето ова, Верати сподели дека повеќе не ужива во клубот и го праша управниот одбор дали ќе го пуштат ако пристигне соодветна понуда. Претседателот на ПСЖ, Насер Ал-Хелаифи не сака да се раздели со него, но спортскиот директор Луис Кампос има поинакво мислење и не е против негов трансфер.
Интерес за Италијанецот има од Саудиска Арабија, но тој нема желба таму да ја продолжи кариерата. Друга опција е Интер Мајами, за каде играчот се уште не е убеден. Враќањето во Италија ќе биде тешко поради финансиската состојба на клубовите од оваа земја. Пореално е повторно да работи со Карло Анчелоти во Реал Мадрид.