Екипите на Атлетико Мадрид и Манчестер Јунајтед вечерва од 21.00 часот ќе се соочат во првиот натпревар од 1/8 финалето на Лигата на шампионите. Двата тима имаат само еден натпревар еден против друг и тоа пред 30 години, кога Атлетико Мадрид го елиминираше противникот во второто коло на КПК со вкупен резултат 4:1.
Атлетико стигна до оваа фаза на турнирот по осми пат во последните девет сезони, а „црвените ѓаволи“ немаа учество од сезоната 2018/2019.
Тренерот на домашната екипа Диего Симеоне има многу проблеми со составот. Капитенот Коке, Даниел Вас и Матеус Куња остануваат надвор од комбинација за оваа средба. Јаник Караско ќе паузира поради казна, а Лемар и Хермосо се под знак прашање. Аргентинецот ќе се потпира на брзината во нападот, каде има играчи како Жоао Феликс и Анхел Кореа. Луис Суарез и Антоан Гризман најверојатно ќе бидат на клупата за резерви.
Вакви проблеми со тимот нема неговиот колега Ралф Рангник. Повредениот Единсон Кавани е единствениот кој не замина во шпанската престолнина. Од првата минута ќе стартува мегаѕвездата Кристијано Роналдо, кој често во кариерата погодуваше против Атлетико Мадрид.
Против Атлетико Мадрид, Роналдо одигра 35 натпревари на кои постигна 25 гола (3 хет-трика) и даде девет асистенции. Очекувањата во двата табора се дека денеска тешко да биде решено кој ќе продолжи понатаму, а судбината на пресметката ќе биде решена дури по реваншот на „Олд Трафорд“.
Веројатни состави:
Атлетико Мадрид: Облак, Савиќ, Фелипе, Рејнилдо, Версаљко, Љоренте, Ерера, Конгдобија, Лоди, Кореа, Феликс.
Манчестер Јунајтед: Де Геа, Телес, Мегуаер, Варан, Далот, Погба, Мектоминеј, Фернандеш, Санчо, Роналдо, Рашфорд.