Македонската одбојкарска репрезентација замина за Белгија каде утре во Шарлоа ќе го одигра и четвртиот меч од Златната лига. По стартниот пораз кај Украина и двете домашни победи над Белгија и Хрватска, пред момците на селекторот Миленкоски, сега нов гостински предизвик.
„Против Белгија немаме некој резултатски притисок и затоа очекувам да играме добро. Пласманот на Ф4 е веќе извесен, Украина е пресилна за останатите од групата, но без разлика на се, наше е да играме и да се бориме на секој меч. Не се отповарени со резултатите и тоа ќе биде добро. Јас сакам да видам како ќе се однесуваат играчите на овие средби на гостински терен, против силни противници, бидејќи такви ќе бидат сите дуели на Европското првенство во Скопје. Ќе дадеме максимим на овие две гостувања, па потоа и на дуелот со Украина во Скопје, кој ќе биде и голем тест и голем предизвик за нас“, вели селекторот на нашата репрезентација, Јошко Миленкоски во разговорот за Спортско радио 90.3 фм пред заминувањето за Белгија.
Дуелот во Шарлоа е закажан за утре од 18 часот. Комплетниот разговор со селекторот Миленкоски следете го низ програмата на Спортското радио 90.3 фм или на следниот ЛИНК.