Утре Македонија игра против Италија историски натпревар, а селекторот Благоја Милевски кој ја води нашата селекција го слави својот 51 роденден. Селекторот е мирен и се обидува да ја насочи концентрацијата на противникот, а на прес-конференцијата збпоруваше за тоа што очекува од своите избраници, но и со комплименти го искажа својот респект кон Италија.
„Секоја репрезентација има свои квалитети и не би издвоил ниту една селекција како урнек како би требало да игра Македонија утревечер. Секоја селекција има различни инвидуалци, различни карактеристики и не издвоил ниту еден национален тим кој личи на нашиот. Натпреварот во Торино пред неколку години за мене нема допирни точки. Тој беше квалификациски, а ова е бараж натпревар и не би размислувал во тој правец.
Атмосферата е одлична и можам само да посакам вакви момци. Дилеми околу тимот немам, составот ми е познат и верувам дека и по тренингот вечерва сите ќе бидат здрави и спремни. Верувам дека сме подготвени за секое сценарио утревечер. Го почитувам Манчини и неговата работа, тој е најзаслужен што Италија е европски првак, но секој си има свој план, така и Манчини, како и јас. Се надевам дека сме подготвени и физички да играме повеќе од деведесет минути. Последната моја порака утре ќе биде сите фудбалери да уживаат во натпреварот.
Македонија неслучајно е тука, покажа квалитет во квалификациите и треба да уживаме и да го дадеме максимумот утревечер. Реален сум и секогаш тргнувам од сопствените редови. Македонија има цел во иднина да стане секогаш конкурентна во квалификации за Европско и Светско првенство. Рано е да се зборува дека сме дел од европскиот крем. Далеку сме од тоа, но имаме талент и потенцијал да бидеме поблиску до европскиот врв“, истакна селекторот Благоја Милевски.