Фудбалската репрезентација на Македонија успеа да го заврши мартовскиот термин за меѓународен настап со две победи на две средби. По триумфот над Малта во квалификациите за ЕП 2024 со 2:1, нашата репрезентација тешко, но заслужено, славеше над Фарски Острови (1:0) во првиот меѓусебен натпревар во историјата.
Овие две победи треба да бидат мотив за следните предизвици кои ја очекуваат репрезентацијата во месец јуни, а прв меч е Украина на домашен терен. За разлика од претходниот натпревар против Малта од евроквалификациите, селекторот Милевски направи шест промени. Во стартниот тим ги немаше Димитриевски, Зајков, Муслиу, Елмас, Трајковски и Миовски, дел од нив беа ослободени поради повреди, дел останаа на клупата.
Во првото полувреме Македонија беше таа која имаше повеќе ппосед на топка и неколку неискористени шанси, но и еден поништен гол во 25. минута, кога Енис Барди доби длабочинска топка, мина крај голманот Рејнатрод и погоди, но оправдано беше поништен погодокот поради офсајд. Во 28. минута, судијата Савовиќ не покажа на белата точка по очигледна игра со рака на еден од дефанзивците на Фарските Острови по центаршут на Стефан Ристовски. Во 37. минута, Езџан Алиоски имаше прекрасна можност за гол, но топката удри во пречката од голот на Фарски Острови.
Првата можност во вториот дел ја имаше Македонија. Дарко Чурлинов во 50. минута направи слалом во одбраната на гостите, претрча сам половина терен, но шутот по земја беше млак и не можеше да заврши во голот на противникот. Конечно во 81. минута Македонија го скрши отпорот на Фарски Острови, Бојан Миовски излезе сам пред голманот откако доби една топка од Ашковски и го совлада со прецизен шут по земја.
Во месец јуни Македонија ја чека еден домашен и еден гостински предизвик. Домашниот е против Украина закажан на 16 јуни, а три дена подоцна, на 19 јуни, националниот тим гостува на „Олд Трафорд“ во Манчестер кај Англија.