Фудбалерот на Ливерпул Мохамед Салах ја освои наградата за играч на сезоната 2017/2018 во англиската Премиер лига во анкетата на Здружението на професионални фудбалери.
Интернационалецот од Египет ги остави зад себе триото од Манчестер Сити Кевин Де Бруин, Лерој Сане и Давид Силва, како и Хари Кејн од Тотенхем и Давид Де Геа од Манчестер Јунајтед.
„За мене е голема чест, особено да бидам избран од колегите“, изјави Салах, откако ја доби наградата во Лондон. „Среќен сум и многу горд. Благодарам на фудбалерите кои ме изгласаа“ заврши Салах.
Салах е лидер на листата на стрелци во Премиер Лигата со 31 погодок во својата прва сезона во Ливерпул, по доаѓањето минатото лето од Рома. Тој има постигнато 41 гол во 46 натпревари во сите натпреварувања и во текот на оваа недела го очекува натпревар против својот поранешен тим во полуфиналето во Лигата на Шампионите.
„Мојата лична желба е да победам со мојата екипа. И секогаш мислам прво за тимот, а потоа за себе. Најважно е да му донесеме на тимот некаков трофеј што може поважен, тоа подобро“ изјави Салах.
Тој е седмиот фудбалер на „Црвените од Енфилд“, кој ја освојува оваа награда, а последен пат тоа му успеало на Луис Суарез во 2013/2014 година.
Лерој Сане ја освои наградата за најдобар млад играч. 22-годишниот Германец му помогна на „Сити“ да ја освои титулата, а оваа сезона има 9 гола и 12 асистенции во 28 натпревари. По него следуваат Хари Кејн (Тотенхем), и соиграчите од „Сити“ Рахим Стирлинг и Едерсон Мораеш како и Маркус Рашфорд од Манчестер Јунајтед.
Рајан Сесињон од Фулам ја освои наградата за играч број 1 во Чемпионшип лигата.