Големата ѕвезда на Баерн Минхен, Џамал Мусиала потпиша нов договор. 21-годишниот фудбалер потпиша договор со Баварците до летото 2030 година.
Раководството на германскиот гигант во последните месеци преговараше со германскиот интернационалец, при што двете страни потпишаа нов договор.
Според „Билд“, Мусиала ќе биде меѓу најплатените во тимот добивајќи 25 мил. евра по сезона. Во неговиот договор има и откупна клаузула вредна 175 мил. евра.
„Навистина сум среќен. Баерн е еден од најголемите клубови во светот. Овде ги направив моите први чекори во професионалниот фудбал и цврсто верувам дека можеме да постигнеме нешто големо со овој клуб во наредните години. Се чувствувам како дома и во Минхен и во клубот со нашите одлични навивачи. Имаме многу работи што сакаме да ги постигнеме“, изјави Мусиала за официјалниот сајт на Баварците.
Џамал Мусиала е дел од Баерн од 2019 година. За првиот тим на Баварците има 193 настапи во кои има постигнато 58 гола.
Баварците од почетокот на годината ги обновија договорите и со Мануел Нојер и Алфонсо Дејвис.

