Рафаел Надал е победник на годинешниот турнир Австралија опен и со тоа го наследи тронот на Новак Ѓоковиќ. Шпанскиот тенисер во финалето беше подобар од Данил Медведев од Русија (2:6, 6:7, 6:4, 6:4, 7:5).
Мечот траеше над пет часа и сигурно ќе остане запаметен како еден од најдобрите во историјата на турнирот кој се игра на „Род Лејвер Арена“.
Мечот започна со доминација на Медведев кој ги доби првите два сета и кога сите очекуваа дека лесно ќе стигне до победа во овој дуел, дојде одговорот од Рафаел надал кој во два сета со по 6:4 успеа да го израмни резултатот на 2:2 во сетови и да се избори за 5-ти решавачки сет. Во поседлниот сет повторно продолжи со добрата игра и со резултат 7:5 го доби сетот кој му ја донесе победата. За Надал ова е втора титула во Австралија, по онаа во 2009 година.
Медведев остана на еден трофеј и пропушти шанса да се искачи на врвот на АТП листата, каде долго време стои Новак Ѓоковиќ. Шпанскиот тенисер сега има 21 Грен слем титула во кариерата, една повеќе во однос на Новак Ѓоковиќ и Роџер Федерер и со тоа е единствениот со ваков успех во кариерата, а неговите ривали се сега на потег.