Екипите на Наполи и Милан се соочуваат вечерва на стадионот „Диего Армандо Марадона“ во реваншот од четвртфиналето на Лигата на шампионите. Пресметката започнува во 21:00 часот, а Росонерите имаат минимална предност од 1:0 по победата на домашен терен пред една недела.
За домаќинот Наполи, победата вечерва е задолжителна, бидејќи само таа може да го квалификува тимот за нивното прво полуфинале во Лигата на шампионите во историјата на клубот. Наполи се претстави добро на првиот меч меѓу двата тима минатата недела, но не успеаја да ги искористат своите шанси и дозволија да бидат надмудрени од противникот.
И покрај тоа што овој месец претрпеа два порази од Милан, од кои првиот беше 0:4 во Неапол, екипата на Наполи ја добија есенската пресметка во Милано со 2:1. Вечерва ќе бараат прва домашна победа над овој противник од август 2018 година.
Денеска Наполи ќе може да смета на својот најдобар стрелец Виктор Осимен, кој поради повреда го пропушти патувањето на „Сан Сиро“ во Милано, но сега е подготвен да му помогне на својот тим да ја анулира негативата.
Навивачите на „наполитанците“ имаат големи очекувања и од Хвича Кварацхелија, кој исто така е способен да ја направи разликата. Тимот на Лучијано Спалети ќе мора да се справи со отсуството на двајца клучни играчи – дефанзивецот Ким Мин-Јае и играчот од средниот ред Андре-Франк Замбо Ангиса, кои се суспендирани за вечерашниот натпревар. Така во одбраната најверојатно ќе се појави Хуан Жесус, а во средниот ред би можеле да играат Танги Ндомбеле или нашиот Елиф Елмас. На Осимен и Кварацхелија ќе им помага во нападот Матео Политано наместо Ирвинг Лозано, кој не импресионираше на првиот меч.
Во Милан можеби имаат водство по домашната победа, но свесни се дека ги очекува многу тешко гостување. Тимот беше во иста ситуација и во 1/8 финалето каде со Лондон гостуваше кај Тотенхем токму по успехот од 1:0 во Милано. На крајот, Росонерите потоа одиграа реми без голови, со што продолжија понатаму. Сега се надеваат на сличен развој на настаните за да можат да се квалификуваат за своето 14-то полуфинале во Лигата на шампионите. Историјата е на страната на миланскиот гигант, кој досега немаше ниту еден пораз во шесте натпревари со италијанските ривали во ЛШ, на кои забележаа три победи и три нерешени.
Се очекува Стефано Пиоли да ги изведе истите 11 од претходниот меч меѓу двата тима, откако на нерешените 1:1 со Болоња не стартуваше ниту еден од играчите на терен што се очекува да стартуваат денеска. Одбраната сигурно ќе ја градат четворица со Фикајо Томори и Симон Кјаер во нејзиниот центар. Стрелецот на првиот натпревар Исмаел Бенасер повторно ќе стартува како плејмејкер. Десно ќе напаѓа Браим Дијаз, а лево Рафаел Леао. Оливие Жиру имаше болки во Ахиловата тетива на левото стапало последните неколку дена, но сепак изгледа дека уште еднаш ќе го предводи нападот на Милан.
Можни состави:
Наполи: Мерет, Де Лоренцо, Рхмани, Хуан Жесус, Оливера, Лоботка, Елмас, Зиелински, Лозано, Осимен и Кваратцхелија.
Милан: Мањан, Калабрија, Томори, Кјаер, Тео Ернандез, Тонали, Круниќ, Дијаз, Бенасер, Леао и Жиру.
Судија: Шимон Марчињак (Полска)
Стадион: „Диего Армандо Марадона“