Младата фудбалска репрезентација на Македонија (У21) ја очекува нов предизвик во квалификацискиот циклус за пласман на Европското првенство (ЕП) кое се игра во 2019 година. нашите млади фудаблери денес ја пречекуваат селекцијата на Ерменија, против која ја имаат единствената победа во овој циклус на гостувањето во Ереван.
Со новиот селектор Добринко Илиевски и новата генерација која се подготвува за наредниот циклус, беше прикажана допадлива игра против Србија, но сепак загубија со гол во финишот од натпреварот. Токму селекцијата на ерменија и овој домашен натпревар може да бидат добра можност да се вратат на победите нашите млади фудбалери, но селекторот Илиевски предупредува дека нема да биде лесно.
„На натпреварот со Ерменија очекувам тежок дуел, од причина што се работи за противник кој има две до три години постари фудбалери. Се работи за цврста репрезентација, која на фаворитите им даде голем отпор. Со Русија освои бод, а против Австрија загуби со 1:2. Се работи за агресивен ривал, кој ќе дојде тука да се надигрува и да бара реванш за поразот во Ереван. Очекувам борбен натпревар, противник кој ќе „гризе“ на теренот, но тоа и нас ќе ни биде генерална проба за натпреварите во следниот циклус“, изјави Добринко Илиевски пред натпреварот.
Првиот натпревар во Ереван на стартот на квалификациите заврши со победа од 3:0 на нашата селекција, но тоа секако не треба да ги залажува нашите играчи и ќе мора да одиграат максимално мотивирано и на овој натпревар.
Мечот меѓу младите селекции на Македонија и Ерменија се игра денес од 15:30 часот на тренинг-центарот „Петар Милошевски“ при Фудбалската федерација на Македонија, а ќе го суди Алекс Тролеис од Фарски Острови.