Денеска претстои нова серија на натпревари од второто коло од групната фаза во Лигата на шампионите. Ќе ги видиме на дело некои од големите фаворити за трофејот, како и дел од тимовите кои се способни да направат изненадување.
Во групата „А“ Наполи гостува кај Ренџерс и ќе се обиде да оствари втора победа откако пред една недела го совлада Ливерпул со 4:1. Сепак, не е лесно да се игра во Гразгов, а поддршката од домашната публика секако ќе биде еден од големите адути на шкотскиот гигант, кој е амбициозен да продолжи во осминафиналето.
Во групата „Е“ Милан го пречекува Динамо (Загреб), кој во првото коло сензационално го совлада Челзи. „Росонерите“ почнаа со реми против РБ Салцбург и денеска ќе мора да одат само на трите бода.
Во другиот натпревар од групата, Челзи игра против РБ Салцбург. Ова ќе биде официјално деби на Грем Потер на чело на „сините“ од Лондон, кои знаат дека се друго освен победа ќе се смета за неуспех.
Групата „Ф“ ни носи два интересни натпревари, актуелниот шампион Реал Мадрид стартуваше со успех на гостувањето кај Селтик, а вечерва на својот „Сантијаго Бернабеу“ го пречекува РБ Лајпциг. Кралскиот клуб е во одлична форма и тоа не навестува добро за германскиот тим кој од почетокот на сезоната игра променливо.
Интересен ќе биде и натпреварот помеѓу Шахтјор (Доњецк) и Селтик. Украинците во првото коло го совладаа РБ Лајпциг со 4:1, а евентуален нов успех значително ќе им ги зголеми шансите за пласман во директната елиминациска фаза.
Пари Сен Жермен во групата „Х“ веќе го победи најсериозниот ривал во групата Јувентус, а сега ќе гостува кај Макаби (Хаифа) со јасна цел да го задржи својот 100% учинок. Лео Меси, Килијан Мбапе и Нејмар се ноќна мора за секоја одбрана и тешко дека израелскиот тим ќе може да се носи со нив.
Јувентус не смее да погреши дома со Бенфика. „Старата дама“ настапува неубедливо од стартот на сезоната, но на овој меч мора да ги покаже вистинските квалитети доколку сака да избегне комплицирање на ситуацијата. Сепак, Бенфика е тежок противник и досега има само победи во сите натпреварувања.
Во групата „Г“ со најголем интерес се чека пресметката помеѓу Манчестер Сити и Борусија (Дортмунд). Ерлинг Халанд ќе се соочи со својот поранешен тим кој стартуваше со победа против ФК Копенхаген (3:0). „Граѓаните“ имаат 3 бода благодарение на победата на „Рамон Санчез Писхуан“ каде ја победија Севиља со 4:0.
Севиља ќе му гостува на ФК Копенхаген во Данска и само победа ќе ги одржи реални шансите за едно од првите две места во групата. Двата тима никогаш досега не се сретнале на европските турнири.