Македонската одбојкарска репрезентација е пред крајот од првата фаза од подготовките за Европското првенство. Селекторот Никола Матијашевиќ ќе им даде мала пауза на одбојкарите, а ја закажа втора прозивка на 14 јули во Маврово кога ќе започнат главните подготовки.
Членот на нашата репрезентација , либерото Дарко Ангеловски смета дека возбудата кај него и соиграчи расте како што се ближи европското првенство.
„Од ден на ден возбудата расте, иако до Европското првенство има уште многу време. Но ако се размисли подобро, и нема премногу време. Затоа се повеќе ја чувствуваме возбудата кај нас што ја предизвикува ова дебитантското учество на еден голем настан како што е ЕП“ , вели македонскиот репрезентативец.
Македонската репрезентација во групната фаза од Европското првенство во Љубљана ќе игра против домаќинот Словенија, како и против Финска, Турција, Русија и Белорусија. Европскиот шампионатот го почнуваме на 12. септември.