Челзи и официјално го претстави своето најголемо зимско засилување. Жоао Феликс денеска позираше со дресот на Челзи, кого ќе го носи до крајот на сезоната.
„Челзи е еден од најголемите клубови во светот и се надевам дека ќе му помогнам на тимот да ги постигне своите цели. Затоа сум многу среќен што сум тука и многу возбуден што ќе играм на „Стемфорд Бриџ“, рече 24-годишниот напаѓач.
Изминатиот период се пишуваше дека португалскиот фудбалер не е среќен во Атлетико Мадрид и побара заминување, а по неколку неделните преговори со повеќе европски гиганти на крај се реши да замине на шестмесечна позајмица во Челзи од Лондон. Челзи за позајмицата на Феликс ќе плати 11 милиони евра, но наводно нема да добие опција за откуп во летниот трансфер период.
Сепак, одредени медиуми шпекулираат дека од Атлетико Мадрид се спремни за таков потег, но доколку се реализира размена со Лукаку, кој моментално е на позајмица во Интер. Феликс во тековната сезона постигна пет гола во сите натпреварувања, а имаше и три асистенции.