На осум лекари на легендарниот аргентински фудбалер Диего Марадона ќе им се суди во нивната матична земја под обвинение за убиство, според пресудата објавена на 22 јуни по истрагата за неговата смрт во ноември 2020 година поради срцев удар, објави Ројтерс.
Во документ од 236 страници, судијата го доведе во прашање однесувањето, активно или неактивно, на секој од обвинетите што придонело за катастрофалниот исход. Во пресудата се истакнува дека осум лица, меѓу кои лекари, медицински сестри и психолог кој се грижел за Марадона, се обвинети за „обично убиство“, сериозно обвинение што значи намерно лишување од живот.
Комисијата назначена да ја истражи смртта на Марадона заклучи дека лекарскиот тим на фудбалската ѕвезда постапил на „несоодветен и непромислен начин“. За возврат, обвинетите ја негираат својата одговорност за смртта на Марадона. Судијата рече дека дел од адвокатите бараат да се прекине случајот.
За злосторство од ваков карактер во Аргентина вообичаено е предвидена затворска казна од 8 до 25 години, според кривичниот законик на земјата. Се уште не е одреден датумот на судење.