Голот на Месут Озил за Арсенал при синоќешната победа од 3:1 над Лестер го направи Германецот лидер според бројот на постигнати голови на еден германски интернационалец во историјата на Премиер лигата. Тоа беше гол број 30 во англиското првенство за фудбалерот, за кого ова е шеста сезона на Островот.
Така тој го остави зад себе Јирген Клинсман и Уве Рослер, кои имаат по 29 погодоци во англиската елита. Токму Клинсман имаше најмногу голови во една сезона во Премиерлигата во дресот на Тотенхем во 1994/95, кога постигна 21 гол, а во 1997/98 беа постигнати останатите негови осум гола, откако се врати во клубот по настапот во Баерн (Минхен ) и Сампдорија. Рослер ги постигна своите 29 погодоци за Манчестер Сити во периодот 1993 – 1996 година.
Топ пет на германските голгетери во Премиер лигата ја дополнуваат Роберт Хут (19), Лукас Подолски (19) и Михаел Балак (17). Вкупно 32 Германци може да се пофалат дека постигнале гол во Премиер Лигата.

