Турскиот клуб Газиантеп се повлече од понатамошното натпреварување во Супер лигата и Купот на Турција. Ова беше објавено на официјалниот сајт на клубот. Претходно и Хатајспор најави неможност за продолжување на учеството на натпреварувањето.
„По таква катастрофа, немаме сила да зборуваме за фудбал. Најпрво им посакуваме Божја милост на нашите граѓани кои загинаа во земјотресот, брзо закрепнување на повредените и успешен исход за сите граѓани кои се уште се под урнатините.
Во овие тешки услови нашиот клуб во моментов не може да продолжи со спортски активности. Согласно одлуката на Управниот одбор, Фудбалскиот клуб Газиантеп одлучи да се повлече од учество во Супер лигата и Купот на Турција во сезоната 2022/2023.
Веруваме дека нашиот град и нашата земја што поскоро ќе ги залечат раните предизвикани од земјотресот. Им благодариме на сите што сега се со нас за поддршката. Нашиот град ќе продолжи да се бори со верба дека наскоро ќе ги пречека сите љубители на фудбалот и повторно ќе се сретнеме со нашите навивачи“, се вели во соопштението на клубот.
Да потсетиме, на 6 февруари во Турција се случија серија земјотреси со јачина од 7,8 степени, чии жртви беа повеќе од 10 илјади луѓе. Во моментов спасувачите продолжуваат со потрагата по преживеани од оваа природна катастрофа.