По долга и тешка борба со карциномот, утрово во Загреб почина едно од најголемите фудбалски имиња во Хрватска и регионот, легендарниот Мирослав Чиро Блажевиќ.
Легендарниот фудбалски тренер почина на ден пред да наполни 88-години по долга борба со ракот. Болеста првпат му беше дијагностицирана во 2011 година, двапати ја победи, но третиот пат за жал не успеа.
Со тренерската работа започна во далечната 1982 година кога на Динамо Загреб, по 24 години чекање, му го донесе трофејот во шампионатот на Југославија. Следната сезона го освои и пехарот „Маршал Тито“ во Купот на Југославија, а подоцна во хрватското првенство со клубот од „Максимир“ беше шампион во 1993 и 2003 година.
Блажевиќ беше и шампион на Швајцарија, откако во сезоната 1983/84 со Грасхоперс беше најдобар во првенството, а една деценија претходно ја предводеше екипата на Сион до трофејот во Купот Швајцарија.
Иако не дојде до трофеј, сепак неговиот најголем тренерски успех веројатно беше како селектор на Хрватска на Светското првенство во Франција во 1998 година, кога хрватската репрезентација под негово водство го освои третото место. Како селектор, една деценија подоцна успеа да ја оживее репрезентацијата на БиХ, но сепак не успеа да ги одведе на Светското првенство во Јужна Африка.