Пари Сен Жермен му понуди на Челзи да го ангажира Нејмар пред затворањето на преодниот рок. Лондончани ќе ја разгледаат понудата, но веројатно нема да дојде до договор.
Сопственикот на „Сините“ Тод Боли е подготвен да го поддржи Томас Тухел и во клубот се привлекуваат потребните играчи, а на Челзи му е потребен напаѓач. Менаџерот сака да го ангажира Пјер-Емерик Обамејанг од Барселона и тој договор изгледа поверојатен. Лондончани денеска го финализираа трансферот на Весли Фофана од Лестер.
ПСЖ бара начини да се раздели со некои од своите играчи за да влезе во рамките на финансискиот фер-плеј. Парижаните ова лето потрошија над 100 милиони, а во клубот пристигнаа Витиња, Нуно Мендеш, Фабијан Руиз, Ренато Санчез и Норди Мучиеле, а од Валенсија се очекува да биде доведен Карлос Солер.
Самиот Нејмар нема желба да си замине и сака да освојува трофеи на „Паркот на принцовите“ покрај неговиот добар пријател Лионел Меси. Сепак, неговиот однос со Килијан Мбапе не е толку добар и тоа е причина за тензија во ПСЖ.