Напаѓачот на Пари Сен Жермен, Нејмар е понуден на Манчестер Сити, објавија медиумите во Париз.
Според изворот, англискиот клуб ја одбил можноста да започне преговори со ПСЖ и претставниците на Нејмар за потенцијален трансфер. Манчестер Сити не сака да го ангажира Бразилецот, бидејќи е задоволен од својата напаѓачка линија. Беше објавено дека главниот тренер на „граѓаните“ Пеп Гвардиола не сака да го дебалансира тимот со доаѓањето на ѕвезда како Нејмар.
Претходно се дозна дека Нејмар не е вклучен во плановите на новиот тренер на ПСЖ, Кристоф Галтиер.
Нејмар му се приклучи на ПСЖ во 2017 година со трансфер од Барселона од 222 милиони евра, што останува најскапиот трансфер во историјата на фудбалот. На 144 натпревари за парискиот тим, напаѓачот постигна 100 гола и даде 60 асистенции. Договорот меѓу двете страни истекува во 2025 година.

