Џудистката, Арбреша Реџепи, откако имаше серија на негативни тестови за Ковид-19, доби дозвола да се појави на церемонијата на свеченото отворање на Летните олимписки игри во Токио. Македонската џудистка заедно со таеквондистот, Дејан Георгиевски, ќе го носи нашето знаме. Ќе потсетиме дека Арбреша Реџепи беше упатена во 24 часовен карантин поради контакт со лице позитивно на корона-вирус.
„Во последен момент по интервенција на Канцеларијата на МОК, Арбреша Реџепи ќе може да присуствува на отварањето на ОИ и ќе го носи македонското знаме. Таа со одлука на Организациониот комитет не е повеќе под надзор заради близок контакт со заразен од КОВИД-19 и таа ќе ја има честа да биде прва спортистка, Олимпијка која ќе го носи македонското знаме на отварањето на летните Олимписки игри!“, стои во соопштението од МОК.
Церемонијата на свеченото отворање на игрите е со почеток во 13 часот а Реџепи својот настап на игрите ќе го има на 25. јули.