Египетската фудбалска асоцијација (EFA) потврди официјално дека најголемата ѕвезда на Ливерпул Мохамед Салах ќе игра за „фараоните” на Светското првенство во Русија од 14 јуни до 15 јули.
Во соопштението се вели дека поради добиената повреда во рамото за време на финалето во Лигата на Шампионите минатата сабота Салах ќе се опоравува три недели, но учеството на Мундијалот не е загрозено. 25-годишниот напаѓач денес имаше дополнителни испитувања во Шпанија, каде што ќе се одвиваат процедурите за негово заздравување.
Мохамед Салах имаше импресивна прва сезона во дресот на Ливерпул, но за време на натпреварот за трофејот во Лигата на шампионите се повреди по дуелот со Серхио Рамос од Реал Мадрид, кој го освои трофејот по победата од 3:1 над Ливерпул. Салах беше принудно заменет по половина час игра во финалето во Киев. Мохамед Салах до овој момент има одиграно 57 натпревари во дресот на Египет и ја имаше главна улога за пласманот на тимот на Мундијалот во Русија со головите во квалификациите. Тој сигурно ги пропушта контролите на Египет против Колумбија (1-ви јуни) и Белгија (6-ти јуни).