Легендата на Баерн Минхен, Томас Милер ќе се раздели со клубот ова лето откако ќе му истече договорот и нема да биде обновен. По долгата кариера која започна во 2008 година во баварскиот гигант, 35-годишниот офанзивен играч за врска е подготвен за нов предизвик.
Иако го напушта германскиот шампион, Милер нема намера да стави крај на фудбалската кариера. Напротив, се чини сè поверојатно дека неговата следна станица ќе биде преку океанот, во фудбалската МЛС лига.
Според информациите на „Билд“, сериозен интерес веќе пројавиле неколку американски тимови. Меѓу нив се и Синсинати и новиот клуб од Сан Диего, кои веќе дадоа конкретни понуди. Дополнително, Кларк Хант – сопственик на Далас и човек со блиски врски со Баерн преку неговото партнерство со Канзас Сити Чифс – исто така има амбиции да го привлече германскиот ветеран. Од своја страна, Баерн Минхен би ја поздравил преселбата на Милер во нивниот партнер тим во МЛС, ФК Лос Анџелес.
Не е исклучено во битката за потписот на искусниот фудбалер да се вклучат и европски клубови. Се очекува Милер и официјално да го напушти Баерн по завршувањето на Светското клупско првенство, кое ќе се одржи меѓу 14 јуни и 13 јули оваа година.

