Македонскиот шампион Шкупи оваа сезона настапуваше во сите три европски купови и по тоа е единствен тим во Европа. Ниеден клуб досега не играше во Лигата на шампионите, Лигата на Европа и Конференциската лига, а во борба за групите на третото натпреварување на УЕФА тимот на Гоце Седлоски ќе игра против косовскиот Балкани (вечерва, 21:00 часот).
Претходно Шкупи загуби и испадна од Шамрок Роверс во третото коло за Лига Европа и тоа ги донесе во плеј-офот на новоформираното натпреварување. Ждрепката посака тимот да игра со косовскиот првак кој по пенали го мина КИ Клаксвик од Фарски Острови. Ова е идеална шанса за Шкупи да игра во групите во едно од натпреварувањата на УЕФА, со што ако успее ќе го повтори успехот на Вардар од 2017 година (групна фаза во Лига Европа) и ќе стане вториот наш клуб во групите.
Во тимот на Балкани има двајца македонци – Ндерим Неџипи, некогашниот играч на Работнички, во улога на спортски директор, како и Артим Положани, некогашен играч на Шкендија во улога на асистент тренер.
Евентуална групна фаза на Шкупи во Конференциската лига на УЕФА ќе му донесе и добра заработка од најмалку три милиони евра. Но, мора да се биде внимателен со Балкани затоа што Шкупи играше претсезонски натпревар со косовскиот првак и доживеа пораз (0:2). Македонскиот шампион се надева дека вечерва ќе слави и со предност ќе замине на реваншот во Косово.