Франција и Швајцарија одиграа драматично осминафинале кое го доби селекцијата на Швајцарија по подобро изведување на пенали со 5:4, а во регуларниот дел и продолженијата мечот заврши нерешено 3:3.
Натпреварот почна лошо за Франција, противничката репрезентација на Швајцарија успеа да го отвори резултатот уште во 15.минута од натпреварот откако Сеферовиќ искористи еден убав центаршут од левата страна и ја смести топката во голот на Уго Лорис за водство на неговата селекција од 1:0.
Веднаш потоа Франција ја превзеде иницијативата, но до крајот на првиот дел не успеа да дојде до израмнување на резултатот. На стартот на вториот дел Франција започна фуриозно, но во 55.минута беше досуден пенал за Швајцарија кој го шутираше Родригез, но неговиот удар го одбрани Лорис, за потоа Франција да успее за само две минути да го сврти резултатот во своја корист.
Во 57.минута Бензема постигна гол на асистенција на Мбапе, а две минути подоцна истиот играч, Карим Бензема повторно се запиша во листата на стрелците, но овојпат асистираше Гризман. Во 75.минута одличен удар на Пол Погба од далечина за водство на Франција од 3:1 и мирен финиш на натпреварот. Сепак за дополнителни возбудувања се погрижи Сеферовиќ кој во 81.минута повторно постигна гол за намалување на резултатот на 3:2.
Пред истекот на регуларниот дел од натпреварот Швајцарија дојде до израмнување на резултатот на 3:3 благодарение на голот кој го постигна Гаврановиќ во 90.минута и го однесе натпеварот во продолженија. По подобро изведување на пенали славеше Швајцарија, а клучното промашување го имаше Мбапе во последната серија.

