Екипата на Силекс од Кратово со чартер лет замина за Баку каде треба да го одигра мечот од првото квалификациско коло од Лигата на шампионите против азербејџанскиот шампион Карабах. Македонскиот тим на хартија е аутсајдер, но со оглед на тоа што се игра еден меч, од Силекс се надеваат дека може да направат изненадување
Тренерот Горан Симов се надева на најдоброто и вели дека фудбалерите мора да веруваат во себе за да го дадат најдоброто на терен.
„По разочарувачко реми со Пелистер работиме да ја подигнеме екипата на психолошки план. Ги оставаме сите работи зад нас и сега сме фокусирани само на мечот со Карабах. Сакам да излезат и на терен да го дадат најдоброто од себе. Мора да веруваме во чуда затоа што во фудбалот често истите се случувале. Се игра еден натпревар, желба ми е да бидеме дициплинирани и да бидеме на ниво, а дали тоа ќе биде доволно и ќе бидеме наградени за тоа со пласман во следното коло ќе видиме по натпреварот“, истакна Симов.
Во составот на Силекс немаат проблем со повредени играчи што значи дека Симов ќе ги има на располагање сите свои фудбалери. Она што е добро во оваа ситуација е дека пред заминувањето за Баку, Силекс ги доби резултатите од тестовите за ковид-19 и сите се негативни.
Дуелот меѓу Карабах и Силексќе се игра утре (вторник) од 18:00 часот на стадионот „Тофик Бајрамов“ во Баку, а ќе го суди Козик од Украина.