Нашите најдобри кошаркари в четврток од 20.15 часот во А1 Арената во рамките на СЦ Борис Трајковски ќе го одиграат воведниот меч од новиот квалификациски циклус за пласман на Европското првенство.
Прв противник ќе ни биде селекцијата на Естонија која главно форсира брза игра со многу трчање. Еден од поискусните во нашиот табот, Марко Симоновски, верува дека нашиот подмладен состав, може да дојде до првата победа во групата во која се уште Русија и селекцијата на Италија која е надвор од конкуренција бидејќи ќе биде ко-домаќин на ЕП заедно со Чешка, Грузија и Германија.
„Имаме неколку нови млади играчи и нов селектор. Естонија игра многу брза кошарка и затоа мора да бидеме крајно внимателни. Верувам дека ќе одиграме според очекувањата и дека ќе ги освоиме првите бодови“ – потенцираше Симоновски за Спортско радио 90,3 фм.