Со факели, аплаузи и многу овации до доцна во ноќта, Улцињ ги пречекуваше некогашните ѕвезди на екс-ју фудбалот на еден голем регионален настан, досега незапаметен на овие простори. Улцињ не е град со голема фудбалска традиција, но три дена е регионален фудбалски центар.
Спортското радио 90.3 фм е дел од промоцијата на книгата и документарниот филм за некогашната фудбалска легенда на Хајдук и на југословенскиот фудбал, Иван Гудељ, на која присуствуваат великаните на некогашниот југословенски фудбал. Фановите со факели на пристаништето во Улцињ синоќа го пречека Иван Гудељ, а со него и другите легенди на хрватскиот фудбал како Ивица Шурјак, Иво Јеролимов, Никица Цукров, Вјеран Симуниќ…
Од Босна и Херцеговина делегацијата на настанот ја предводат легендарните Мехмед Баждаревиќ, Фарук Хаџибегиќ, Предраг Пашиќ, Хусреф Мусемиќ, Мирсад Фазлагиќ и др.
Тука се и дел од легендите на црногорскиот и српскиот фудбал, а меѓунив со посебни овации беше пречекан и белградскиот коментатор Милојко Пантиќ, како и нашиот Драган Канатларовски кој е меѓу гостите кои ќе присуствуваат на промоциите на книгата и филмот за Гудељ.
Книгата е со наслов „Хајдукова приказна“ и е дело на авторот Блаж Дупланчиќ, додека документарниот филм во режија на познатиот режисер Томислав Жаје носи наслов „Иванова игра“.
Иван Гудељ рано ја заврши својата фудбалска кариера на само 27 години, поради здравствени проблеми. За нашата јавност е интересно да се знае дека дел од неговата рехабилитација успешно ја помина и во Македонија, поточно во Отешево.
