Лигата на шампионите се враќа на сцена , а во очекување сме за уште поинтересни пресметки и со уште поголем број претенденти за титулата.
Со осум натпревари денеска се отвора битката во групната фаза, а исто толку ќе се одиграат во среда. Промена на распоредот нема, бидејќи во 18.45 часот ќе има два меча, а останатите во 21 часот.
Овој пат финалето ќе биде во Истанбул на 10 јуни 2023 година.
Шампионот Реал Мадрид докажа дека никогаш не треба да биде отпишан, но оваа сезона ќе мора да го брани трофејот во жестока конкуренција. Пари Сен Жермен кој има многу ѕвезди, Манчестер Сити подобрен со Ерлинг Халанд, Барселона која повторно оживува и Ливерпул со докажана класа се меѓу фаворитите за кревање на трофејот.
Самоуверените италијански шампиони Милан, Интер, секогаш амбициозните Баерн, Тотенхем и Јувентус исто така бараат шанса да импресионираат, а гарантираат интересни дуели.
Ајнтрахт (Франкфурт), кој минатата сезона триумфираше во Лига Европа, дебитира во групите од Лигата на шампионите. Така, за прв пат во историјата дури пет германски екипи ќе бидат дел од групната фаза. Вреди да се напомене и фактот дека и двата шкотски гиганти – Селтик и Ренџерс – исто така се тука.
Правилата за пласман понатаму од групите останува иста. 32 екипи се поделени во 8 групи, при што првите две продолжуваат во 1/8-финалето, третата во поредокот се префрла во Лига Европа, а последната е елиминирана и нема да оди на ниту еден од другите турнири.
Разликата овојпат е што групната фаза ќе заврши брзо – до почетокот на ноември, а тоа е направено поради Светското првенство кое започнува на 20 ноември. Така натпреварите во групи ќе се играат на 6/7 септември, 13/14 септември, 4/5 октомври, 11/12 октомври, 25/26 октомври и 1/2 ноември.
Веќе на првиот натпреварувачки ден не очекува возбудлив дуел како ПСЖ – Јувентус, а шампионот Реал Мадрид ќе се докаже против борбениот Селтик во Шкотска. Манчестер Сити ќе гостува кај Севиља, а гостување кај непредвидлив противник во лицето на Динамо (Загреб) има и уште еден од водечките англиски тимови – Челзи.